Ուրուգվայում Հայաստանի դեսպանատանը տեղի է ունեցել «Հայաստանը՝ պարտադիր այցելելու վայր» խորագրով միջոցառում

26 փետրվարի, 2026

Փետրվարի 26-ին Ուրուգվայում Հայաստանի դեսպանատանը տեղի է ունեցել «Հայաստանը՝ պարտադիր այցելելու վայր» խորագրով միջոցառումը, որի ընթացքում Ուրուգվայի խոշոր և ճանաչված զբոսաշրջային գործակալություններից մեկը՝ Hiperviajes-ը, հայտարարել է Հայաստանը՝ որպես նոր և հեռանկարային զբոսաշրջային ուղղություն, իր առաջարկների ցանկում ներառելու մասին։

Դեսպան Գևորգյանն իր խոսքում անդրադարձել է Հայաստանի զբոսաշրջային ոլորտի արձանագրած առաջընթացին, կառավարության կողմից իրականացվող ռազմավարությանը և բարեփոխումներին, ինչպես նաև՝ երկրի հարուստ մշակութային ժառանգությանը, բնական գեղեցկություններին և բազմազան զբոսաշրջային հնարավորություններին։ ՀՀ դեսպանն ընդգծել է, որ Հայաստանը, լինելով պատմամշակութային արժեքներով հարուստ, անվտանգ և զարգացած ենթակառուցվածքներով երկիր, առաջացնում է աճող հետաքրքրություն միջազգային զբոսաշրջիկների շրջանում՝ ներկայացնելով նաև վերջին տարիների վիճակագրական տվյալները:

Միջոցառման ընթացքում ելույթներով հանդես են եկել նաև Hiperviajes ընկերության գործադիր տնօրեն Ֆերնանդո Ռիվասը, կորպորատիվ ղեկավար Անդրեա Բեժոլիոն և վաճառքի պատասխանատու Էուխենիա Կալվետտեն՝ ներկայացնելով Հայաստան այցելության հնարավորությունները, առաջարկվող երթուղիները և տարվա բոլոր եղանակների համար նախատեսված զբոսաշրջային առաջարկները։

Միջոցառմանը ներկա էին Ուրուգվայի Զբոսաշրջության նախարարության, Զբոսաշրջային գործակալությունների ասոցիացիայի և զբոսաշրջային ոլորտի երկու տասնյակից ավելի ընկերությունների, ԶԼՄ-ների ներկայացուցիչներ, ինչպես նաև՝ սենատոր, Զբոսաշրջության նախկին նախարար Լիլիամ Կեչիչյանը:

Միջոցառման ավարտին տեղի ունեցավ հայկական ուտեստների հյուրասիրություն։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր