Ուրուգվայի Զբոսաշրջության նախարարությունում տեղի է ունեցել «Բացահայտիʼր Հայաստանը» խորագրով միջոցառում

04 սեպտեմբերի, 2025

Սեպտեմբերի 4-ին Ուրուգվայի Զբոսաշրջության նախարարությունում տեղի է ունեցել միջոցառում՝ նվիրված Հայաստանի զբոսաշրջությանը, որին բացման խոսքերով հանդես են եկել դեսպան Մարիամ Գևորգյանն ու Զբոսաշրջության նախարար Պաբլո Մենոնին:

«Բացահայտիʼր Հայաստանը» խորագրով միջոցառմանը դեսպան Գևորգյանն իր ելույթում անդրադարձել է Հայաստանի զբոսաշրջային գրավչություններին՝ շեշտելով, որ հազարամյակների պատմությունն ու մշակութային ժառանգությունը, համադրվելով ժամանակակից կյանքի ու նորարարության հետ, Հայաստանը դարձնում են բացառիկ զբոսաշրջային ուղղություն:

ՀՀ դեսպանն անդրադարձել է նաև Հայաստանի զբոսաշրջային քաղաքականությանը և վերջին տարիներին զբոսաշրջության ոլորտում արձանագրված տպավորիչ աճին՝ ներկայացնելով վիճակագրական տվյալներ:

Դեսպան Գևորգյանը շնորհակալություն է հայտնել Ուրուգվայի Զբոսաշրջության նախարարին՝ դեսպանության այս նախաձեռնությանն աջակցելու և միջոցառմանը ներկա գտնվելու համար:

Նախարար Մենոնին շեշտել է, որ մեծ ուրախություն է հյուրընկալել Հայաստանի մասին այս միջոցառումը՝ նշելով, որ այն հնարավորություն կընձեռի ավելին իմանալ Հայաստանի հարուստ պատմության ու մշակույթի, ինչպես նաև՝ նրա տեսարժան վայրերի մասին: Ուրուգվայի Զբոսաշրջության նախարարը նաև ընդգծել է ուրուգվայահայ համայնքի կարևորությունը և ուրուգվայցիների բարեկամական վերաբերմունքը նրա նկատմամբ:

Ուրուգվայի Հանրապետության համալսարանում հայոց լեզվի և մշակույթի դասընթացի դասախոս, պրոֆեսոր Հովհաննես Բոդուկյանը հանգամանորեն ներկայացրել է Հայաստանի մշակութային ժառանգությունը և Հայաստանի զբոսաշրջությանն առնչվող մի շարք տեղեկություններ:

Միջոցառմանը ներկա են գտնվել Զբոսաշրջության ազգային տնօրեն Կրիստիան Պոսը, խորհրդարանականներ, այդ թվում՝ սենատոր, Զբոսաշրջության նախկին նախարար Լիլիամ Կեչիչյանը, Արտաքին հարաբերությունների նախարարության և Մոնտեվիդեոյի քաղաքապետարանի բարձրաստիճան պաշտոնյաներ, մի շարք տուրիստական գործակալությունների ներկայացուցիչներ, լրագրողներ:

Միջոցառման ավարտին տեղի է ունեցել հայկական ուտեստների և գինիների հյուրասիրություն:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր